احنا مين

حكايتنا

ليه عملنا "وجدتها"؟

Our Story

تعرف إن في موقع في مصر بيبيع مانجا؟ مانجا بس، مش مانجا وأنواع فاكهة تانية ولا مانجا وخيار مثلاً. جنة مانجا متخصصة. طب فاكر كام مرة كان نفسك في مانجاية ساقعة تطري على قلبك في الصيف بس مش قادر تنزل تشتري من السوبرماركت أو الفكهاني؟ دي مش عيشة بصراحة.

بعيداً عن حبنا الأبدي (الأفلاطوني) للمانجا، احنا لاحظنا نمو مجال التجارة الإلكترونية في مصر بشكل ثابت خلال السنين اللي فاتت، وشفناه بيزدهر خلال الكام شهر اللي فاتوا. وعشان كدة، وبما إننا شغالين في مجال التكنولوجيا وبنحب فكرة تجميع البيانات والمعلومات، قولنا "احنا نعمل دليل بيجمع كل مواقع التسوق على الإنترنت في مصر"! وأهو طلع للنور زي ما انتوا شايفين.

في رحلة شغلنا على الموقع دة تخيلنا إننا هنلاقي 200-300 محل أونلاين ونبوس إيدينا وش وضهر ويبقى تمام أوي. في الوقت الحالي الدليل ده بيضم أكتر من ألف (أيوة 1000) موقع للتجارة الإلكترونية بيبيع كل حاجة بدايةً من المانجا (أساسي) لحد قطع غيار السيارات والخدمات والإلكترونيات ومنتجات الشعر المجعد والبقالة والملابس والمفروشات المنزلية وحاجات تانية كتير.

والمفاجأة إننا شغالين على إضافة أكتر من 1000 موقع تاني!

احنا حقيقي منبهرين من حجم مجال التجارة الإلكترونية اللي اكتشفناه وبالذات ان كتير من المواقع دي بتبيع منتجات مصرية بحتة - واحنا سعداء إننا بنحاول تسليط الضوء على العلامات التجارية دي. احنا كمان عايزين نساعد المستهلكين إنهم يلاقوا اللي بيدوروا عليه بسرعة وبسهولة سواءً دة كان منتج أو خدمة حكومية ممكن يخلصوها أونلاين.

تابعونا دائماً علشان احنا شغالين على شوية حركات ظريفة. دي مجرد بداية بس :)

لو عجبك الموضوع وعايز تساهم معانا في الرحلة دي، انشر الخبر وخللي الناس تعرف Wagadtoha!

اشترك في النشرة البريدية

متفوتش التحديثات اللي هنعملها والمواقع الجديدة اللي هنضيفها!